【精怪】
【精怪】
【貓徙腳步】
貓徙腳步
恬恬……
恬恬仔
攀過圍牆
去到
遠遠个地方
毋知驚險
直直直直 行
尾翹到筆直
成時 搖擺像蛇
定定仔 穩穩仔
在月光下
向前 緊行
【離巢鳥子】
細人仔大欸
就像鳥子離巢
總有佢自家个天地
翼胛生齊
試試仔就想愛飛
頭探探仔
望等該又高又闊个天
想愛飛
一日無幾多時在屋下
一年轉無幾多擺
老屋个老哀仔
日日企在門口望
頭探探仔
望
該離巢个鳥子
哪久正想轉屋下?
【包袱仔】
肩頭背等一隻包袱仔,上臺北
手項挽等兩包 包袱仔
上臺北
一臺電腦、兩隻阿姆䌈个粽仔
一領薄被、五粒阿爸種个朳仔
吾个本等,吾个活力
故鄉个日頭,故鄉个土地
總下揤落包袱仔,帶上臺北
𠊎背等包袱仔,
𠊎背等全世界。